Simpleng Sinigang - Sikretong Recipe na Masarap

Hindi ako marunong magluto. Pero salamat sa internet at may nakuha akong recipe para sa pagluto ng sinigang. Ilalagay ko lang sa search bar kung anong ulam ang gusto kong lutuan at POOF! parang magic! May lalabas ng mga listahan ng websites kung paano lutuin ito.

Alam ko na namimis niyo na ang lutong-bahay ng nanay mo. Kahit madalas kang sigawan ng nanay mo dahil panay ang basketball mo, ayos lang sa iyo dahil uuwi ka naman at matitikman ang kanyang masarap na nilutong ulam.

Ito ang mga kakailanganin mong sangkap para magluto ng Sinigang:

                ½ kg karne ng baboy

                2-3 piraso na kamatis

                2-3 piraso ng sibuyas

                asin

                kangkong

                sitaw

                talong

                okra

                tamarind mix

Kung ayaw mong ng karne ng baboy, pwede ding hipon. Pwede ka ding bumili ng butu-buto. At depende na sa katamaran mong maghimay ng gulay kung gusto mo itong bawasan o dagdagan dun sa nilista kong gulay dito. Maglalasang sinigang pa din iyan dahil sa ibubudbod mong tamarind/sampaloc mix.

1. Hiwain ang baboy. Ikaw ng bahala maghiwa kung gaano kalaki gusto mo. Pero huwag mo namang itapon na lang sa kaldero yung baboy na hindi hinihiwa dahil mas mahabang oras ng pagpapakulo ang kailangan mo para lumambot ito. At saka hiwain mo ng pare-parehas ng laki para pantay ang pagkakaluto nila.
2. Maghiwa ng sibuyas at kamatis. Hatiin sa gitna ang bawat isa at hatiin muli ang bawat kinalahating parte.
3. Ihagis sa kaldero ang baboy, sibuyas at kamatis. Lagyan ito ng katamtamang dami ng tubig na matatakpan yung dami ng karne.
4. Sindihan ang kalan at pakuluan ito ng ½ hanggang sa 1 oras. Huwag mong kakalimutan na lagyan ng konting asin ang pinakukuluan.
5. Para sa gulay, pitasin ang dahon ng kangkong. Ilagay sa lalagyan para mahugasan.
6. Hugasan ang talong, okra at sitaw bago hiwain. Putulin ang sitaw na kasinghaba ng kalahati ng iyong hintuturo. Huwag isama ang puno at dulo ng gulay, itapon ito.
7. Ganun din ang gawin mo sa okra at sa talong. Hiwain ito ng malaliit at katamtaman lang sa ilang kagat para madaling maluto.
8. Kapag malambot na ang baboy, ibudbod ang sampaloc mix. Haluin ang sabaw at tikman kung tama lang ang asim. Dagdagan pa ng tubig kapag sobrang asim, o idagdag ang mix kapag kulang sa asim. Gumamit ka ng ibang kutsara sa pagtikim
9. Limang minuto bago iahon ang kaldero sa apoy, ilagay ang talong at okra. Pakuluan pa ito ng kaunti.
10. Dalawang minuto bago patayin ang apoy, ilagay ang sitaw.
11. Pagkaahon ng kaldero sa apoy, ipatong sa ibabaw ang dahon ng kangkong. Haluin ang sabaw.

May masarap ka ng sinigang! Ihanda ito kasama ang mainit na kanin at pritong isda. Sabay lagukan mo ng malamig na tubig! Busog!

Ang servings ng sinigang na ito ay depende kung gaano ka kasiba. Pero kung hindi naman, good for 3-4 na katao ang nilutong sinigang. Maipagmamalaki ka na ng nanay mo!

• Pagkaing Masarap ni Didjay Bumbay
• Mga Bagong Karanasan sa Singapore
• 40 percent Family Allowance aka remit ng Pera
• Kapag Umuulan Isang Pagkain lang ang Katapat Mo: Tapsilog
• Galit Ako sa Mga Pasaway na Katrabaho sa Opisina